Физика саласындағы 2020 жылғы Нобель сыйлығы сейсенбі күні Роджер Пенроуз, Рейнхард Генцель және Андреа Гезге берілді, деп жазады Euronews агенттігі.
Өз кезегінде, бұл туралы Швед корольдік ғылым академиясының физика саласындағы Нобель комитеті хабарлаған болатын.
Комитет шешімінде айтылғандай, Пенроуз «қара құрдымың пайда болуы жалпы салыстырмалылықтың сенімді болжамы екенін ашқаны үшін» марапатталды.
Генцель мен Гез галактика орталығында салмағы ауыр, бірақ ықшам нысанды ашқаны үшін лауреат атанды.
Айта кетейік, Пенроуз сыйақының жартысын, Гензель мен Гез жартысын алады.
Естеріңізге салсақ, өткен жылы Нобель сыйлығы «физикалық космология саласындағы теориялық зерттеулері» үшін канада-америкалық ғалым Джеймс Пиблзге, сондай-ақ швейцариялық астрофизик Мишель Майор мен Дидье Келоға «күн түріндегі жұлдыздың айналасында экзопланетаны ашқаны үшін» берілген еді.
Бұған дейін, 5 қазанда физиология және медицина бойынша 2020 жылғы Нобель сыйлығы С гепатиті вирусын ашып, осы дертпен күреске үлес қосқан ғалымдар – америкалық Харвин Олтер мен Чарльз Райс және британдық Майкл Хоутон алды.