Фото: Halyq Uni
Сыбайлас жемқорлыққа қарсы қызметтің Солтүстік Қазақстан облысы бойынша басқармасы «Бизнеске жол» жобасын іске асыру аясында «Аграрлық несие корпорациясы» АҚ облыстық филиалының басшысын ұстады, — деп хабарлайды «Ұлт ақпарат» баспасөз қызметіне сілтеме жасап.
«Ол ауыл шаруашылығы тауар өндірушілерінен бірнеше рет пара алды деген күдікке ілінді. Пара сомасы 100 мыңнан 500 мың теңгеге дейінгі мөлшерді құрады.
Ақшалай қаражат ҚР Агроөнеркәсіптік кешенін дамыту жөніндегі 2021-2025 жылдарға арналған ұлттық жоба шеңберінде бөлінетін кредиттік қарыздарды беру мәселесін оң және кедергісіз шешуге арналған.
Күдікті Петропавл қаласының уақытша ұстау изоляторына қамалды. Сотқа дейінгі тергеу жалғасып жатыр», — делінген хабарламада.
Қылмыстық-процестік кодексінің 201-бабына сәйкес тергеу мүддесі үшін өзге ақпарат жария етуге жатпайды.
Конституцияның 77-бабы 3-тармағының 1-тармақшасына және Қылмыстық-процестік кодексінің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі.